Diwali Vrat Katha | दीपावली व्रत कथा

Deepawali Vrat Katha

Deepawali ka pavan parv Kartik maas ki Amavasya ko manaya jata hai| Is din Mata Lakshmi aur Bhagwan Ganesh ki vishesh puja-archana ki jati hai| Deepawali vrat se judi kai pauranik aur lok kathayein prachalit hain, jinmen se do mukhya kathayein neeche di gayi hain:

1. Sahukar Ki Beti Aur Mata Lakshmi Ki Katha

Prachin samay mein ek gaon mein ek sahukar rahta tha| Uski beti pratidin Peepal ke ped par jal chadhane jati thi| Us Peepal ke ped par Lakshmi ji ka vaas tha| Ek din Lakshmi ji ne prakat hokar sahukar ki beti se kaha, “Tum meri saheli ban jao|” Ladki ne apne pita se puchkar Lakshmi ji se mitrata kar li|

Ek din Lakshmi ji ne sahukar ki beti ko apne ghar bhojan par aamantrit kiya| Lakshmi ji ne use sone-chandi ke bartanon mein chhappan bhog khilaye aur vida karte samay mulyavan upahar diye| Jab vah lautne lagi, to Lakshmi ji ne muskurakar kaha, “Ab tum mujhe apne ghar kab bula rahi ho?” Sahukar ki beti ne nimantran to de diya, lekin apni garibi ke karan vah chintit ho gayi|

Jab sahukar ne beti ko udas dekha, to usne dhandhas bandhaya aur kaha ki tum ghar ki saaf-safai karo aur mitti ke chauke ko swachh kar Lakshmi ji ka dhyan karo| Tabhi ek cheel kisi rani ka naulakha haar lekar ud rahi thi, usne vah haar sahukar ke ghar ke aangan mein gira diya| Sahukar ne us haar ko bechkar sundar pakvan aur सोने ki chauki ki vyavastha ki|

Jab Mata Lakshmi Bhagwan Ganesh ke saath sahukar ke ghar aayin, to vahan ki safai aur bhakti dekhkar atyant prasann huin| Unhone sahukar ke ghar ko dhan-dhanya aur sukh-samriddhi se bhar diya| Tabhi se Deepawali ke din Lakshmi puja aur is katha ko sunne ki parampara chali aa rahi hai|

2. Raja Bali Aur Mata Lakshmi Ki Katha

Dusri pauranik katha ke anusar, jab Bhagwan Vishnu ne Vaman avatar lekar daniveer Raja Bali se teen pag bhumi daan mein maangi thi, tab unhone do pag mein dharti aur aakash naap liya| Teesre pag ke liye Raja Bali ne apna sir aage kar diya| Bhagwan Vishnu unki danveerta se atyant prasann hue aur unse vardan maangne ko kaha| Raja Bali ne vardan mein maanga ki Bhagwan Vishnu sadaiv unke saath Patal lok mein nivas karein| Bhagwan apne bhakt ke vachan se bandh gaye aur Patal chale gaye|

Idhar Vaikuntha mein Mata Lakshmi vyakul ho gayi| Apne pati ko vapas lane ke liye Mata Lakshmi ne ek garib stri ka roop dharan kiya aur Patal lok mein Raja Bali ke paas pahunchin| Kartik maas ki Amavasya ke din Mata Lakshmi ne Raja Bali ki kalai par rakshasutra (Rakhi) bandha aur unhe apna bhai banaya| Jab Raja Bali ne upahar dene ki iccha prakat ki, to Mata Lakshmi apne vastavik roop mein aa gayi aur unhone upahar swarup Bhagwan Vishnu ko maang liya| Raja Bali ne saharsh apne bhai ka dharm nibhate hue Vishnu ji ko vida kiya| Yah pavan prasang Deepawali ke din sampann hua tha, isliye bhi is din Lakshmi-Narayan ki vishesh aaradhana ki jati hai|

Puja Vidhi: For detailed Diwali Lakshmi Puja Vidhi, check the guide below:

Diwali Lakshmi Puja Vidhi | दीवाली लक्ष्मी पूजा विधि

Detailed Puja Vidhi for Diwali, including Ganesh-Lakshmi Puja, Shri Suktam, and Lakshmi Aarti.

Read Now →

(Katha Samapt)