Ekadashi Vrat Katha | एकादशी व्रत कथा

|| Ekadashi Vrat Katha ||

Ekadashi vrat Bhagavan Vishnu ko atyant priya hai. Skand Puran ke anusar iski utpatti ki katha is prakar hai:

Satyayuga mein Mur naam ka ek atyant balshali aur bhayankar daitya tha. Usne Indra, Aditya, Vasu, Agni aadi sabhi devtaon ko parajit kar swarg se nikal diya. Dukhi hokar sabhi devta Mahadev ke pas gaye. Bhagavan Shiv ne unhe Vishnu Ji ki sharan mein jaane ko kaha.

Bhagavan Vishnu aur Mur daitya ke beech kai varshon tak yuddh chala. Yuddh karte-karte Bhagavan thak gaye aur Badrikashram ki ek gupha (Singhavati) mein vishram karne chale gaye. Mur daitya unka picha karte hue vahan pahuncha aur soye hue Bhagavan par prahar karna chaha. Usi samay Bhagavan ke sharir se ek divya jyotipunj kanya prakat hui. Usne Mur daitya ke sath yuddh kiya aur use pachhad diya. Jab daitya murchhit hokar gira, to kanya ne uska sir kaat diya.

Bhagavan jab jaage, to unhone kanya se uske bare mein pucha. Kanya ne bataya ki vah unhi ke ansh se utpann hui hai. Bhagavan ne prasann hokar use ‘Ekadashi’ naam diya aur kaha ki aaj ke din jo bhi manushya shraddhapuvak vrat rakhega, use samast paapon se mukti milegi aur ant mein Baikunth prapt hoga. Yah katha ‘Utpanna Ekadashi’ ke naam se bhi jaani jaati hai.

(Katha Samapt)