Somvar Vrat Katha | सोमवार व्रत कथा

|| Somvar Vrat Katha ||

Somvar ka vrat Bhagavan Shiv ko samarpit hai. Puranik manyataon ke anusar, is vrat ko karne se sabhi manokamnayein purn hoti hain aur jivan ke kasht dur hote hain.

Vrat Katha

Ek samay ki baat hai, kisi nagar mein ek atyant dhani sahukar rahta tha. Uske ghar mein dhan-dhanya ki koi kami nahi thi, lekin uski koi santan nahi thi. Is karan vah bahut dukhi rahta tha. Putra prapti ki iccha se vah pratyek Somvar ko Bhagavan Shiv ka vrat rakhta tha aur puri shraddha ke sath shivalay mein jakar Bhagavan Shiv aur Mata Parvati ki puja karta tha.

Uski bhakti dekhkar ek din Mata Parvati prasann ho gayin aur Bhagavan Shiv se us sahukar ki manokamana purn karne ka agrah kiya. Mata Parvati ke kahne par Bhagavan Shiv ne sahukar ko putra-prapti ka vardan to diya, lekin sath hi yah bhi kaha ki is balak ki ayu keval 12 varsh hi hogi.

Sahukar ka putra jab 11 varsh ka hua, to use padhne ke liye Kashi bhej diya gaya. Sahukar ne balak ke mama ko bulakar use bahut sara dhan diya aur kaha ki tum is balak ko vidya prapti ke liye Kashi le jao. Raste mein tum jis bhi sthan par rukna, vahan yagya karna aur brahmanon ko bhojan karana.

Raste mein ek nagar pada, jahan ke raja ki kanya ka vivah tha. Jis rajkumar se uska vivah hone vala tha, vah ek aankh se kana tha. Rajkumar ke pita ne sahukar ke putra ko dulha banakar rajkumari se vivah karva diya. Lekin balak ne rajkumari ki odhni par likh diya— “Tumhara vivah to mere sath hua hai, lekin jis rajkumar ke sath tumhe bheja jayega, vah ek aankh se kana hai.” Rajkumari ne yah padhkar kane rajkumar ke sath jane se mana kar diya.

Udhar, Kashi mein jab balak 12 varsh ka hua, to uske pran nikal gaye. Mama ke vilap ko sunkar vahan se guzar rahe Bhagavan Shiv aur Mata Parvati ne use dekha. Mata Parvati ke baar-baar agrah karne par Bhagavan Shiv ne us balak ko punarjivita kar diya. Balak “Om Namah Shivaya” japte hue uth baitha.

Vidya puri karke jab balak apni patni (rajkumari) ke sath vapas lauta, to sahukar aur uski patni bahut prasann hue. Usi raat Bhagavan Shiv ne sahukar ke swapn mein aakar kaha— “He vaishya! Maine tumhare Somvar ke vrat aur katha sunne se prasann hokar tumhare putra ko lambi ayu pradan ki hai.”

(Katha Samapt)