Pradosh Vrat Katha | प्रदोष व्रत कथा

|| Pradosh Vrat Katha ||

Prachin kaal mein ek atyant nirdhan brahmani thi. Uske pati ki mrityu ho chuki thi. Vah apne chhote putra ke sath bhiksha mangkar apna jeevan vyateet karti thi. Ek din jab vah bhiksha lekar laut rahi thi, use nadi ke tat par ek sundar baalak mila. Vah baalak Vidarbha desh ka rajkumar tha, jiske pita ko shatruon ne yuddh mein maar diya tha aur rajya chheen liya tha.

Brahmani ne us baalak ko apne putra ke saman paala. Ek baar ve Shandilya rishi ke aashram pahunche. Rishi ne brahmani ko Pradosh vrat karne ki vidhi batayi. Brahmani ne shraddhapuvak vrat kiya. Kuch samay baad brahmani ka putra aur rajkumar van mein vihar kar rahe the, jahan unki bhent gandharva kanyaon se hui. Rajkumar ka vivah Anshumati naam ki gandharva kanya se hua.

Gandharvon ki sahayata se rajkumar ne apne shatruon par vijay prapt ki aur apna khoya hua rajya punah prapt kiya. Usne brahmani ke putra ko apna pradhan mantri banaya. Yah sab Pradosh vrat ke punya pratap se sambhav hua. Manyata hai ki jo bhi manushya Pradosh kaal mein Bhagavan Shiv ki puja aur katha shravan karta hai, uske sabhi kasht door ho jaate hain.

(Katha Samapt)