Hartalika Teej Vrat Katha | हरतालिका तीज व्रत कथा

|| Hartalika Teej Vrat Katha ||

Bhagwan Shiv ne swayam Mata Parvati ko unke poorv janm ka smaran karane ke liye yeh katha sunayi thi.

Katha: Hey Gauri! Parvatraj Himalaya par sthit Ganga ke tat par tumne apni balyavastha mein barah varshon tak adhomukhi hokar ghor tap kiya tha. Tumhari is kathor tapasya ko dekhkar tumhare pita atyant dukhi the. Ek din Devarshi Narad tumhare pita ke paas aaye aur kaha, “Maharaj! Bhagwan Vishnu aapki kanya ki tapasya se prasann hain aur ve unse vivah karna chahte hain.” Parvatraj Himalaya ne prasannatapuvak is prastav ko sweekar kar liya.

Jab tumhe pata chala ki tumhara vivah Bhagwan Vishnu se tay ho gaya hai, to tum bahut dukhi huin, kyunki tum man hi man mujhe (Shiv ko) apna pati maan chuki thin. Tumne apni vyatha apni ek saheli ko batayi. Tumhari saheli tumhe ek ghane jangal mein le gayi aur ek gufa mein chhupa diya.

Chunki tumhari saheliyon ne tumhara ‘haran’ (apaharan) karke tumhe jangal mein pahunchaya tha, isiliye is vrat ka naam ‘Hartalika’ pada (Harat - Haran, Aalika - Saheli).

Us gufa mein tumne ret ka Shivling banaya aur nirahar (bina ann-jal ke) rehkar meri aradhna ki. Bhadrapad Shukla Tritiya ke din Hast nakshatra mein tumne raat bhar jagran kiya aur stuti ki. Tumhari is kathor tapasya se mera aasan dolne laga aur mein swayam wahan prakat hua.

Maine tumse vardaan mangne ko kaha, tab tumne kaha, “Hey Mahadev! Mein aapko hi pati roop mein prapt karna chahti hoon.” Maine ‘Tathastu’ kehkar tumhari manokamna poorn ki.

Agle din tumhare pita tumhe dhoondhte hue us gufa tak pahunche. Tumne unhe bataya ki tumne apna jeevan Shiv ko samarpit kar diya hai. Antatah tumhari dridhta ko dekhkar pita maan gaye aur vidhi-vidhan se hamara vivah sampann hua.

(Katha Samapt)